Tirohanga whānui

Ka rongo te Ruku Tātari Kaupapahere Wharenoho me ngā Ratonga (Wai 2750) i ngā kerēme e toe ana me ngā nawe e pā ana ki te kaupapahere wharenoho me ngā ratonga. He maha ngā kerēme i whakapae i te mūhore o te Karauna ki te whakatūturu i te āhua rawaka o te whare noho mō ngāi Māori, tuawhenua, tāone rānei, kia whakarato i ngā ratonga kāwanatanga, hōtaka, tautoko hoki e tautoko ana i te āhei a ngāi Māori ki te whare noho rawaka.

Te ahu whakamua o te ruku tātari

Wāhanga tuatahi

I te Hepetema o 2020 ka whakaū te Taraipiunara ka tīmata te ruku tātari ki te wāhanga tuatahi e arotahi ana ki te kāinga kore mō ngāi Māori mai i te tau 2009 ki tēnei wā. Ka kapi i te korahi mō te ruku tātari wāhanga tuatahi ko:

Ko ngā kaupapahere, ngā tikanga, ngā mahi me ngā hapanga a te Karauna i whakapaetia mai i te 1 o Ākuhata 2009 ki nāianei ina hāngai ana ki te rautaki ā-motu (ngā rautaki rānei) e urupare ana ki ngā take o te kāinga kore mō ngāi Māori.
Te urupare a ngāi Māori ki ngā kaupapahere, ngā tikanga me ngā hapanga mai i te 1 o Ākuhata 2009 ki nāianei e puta mai ana i te rautaki ā-motu o te Karauna (ngā rautaki rānei).

Kāhore he ruku tātari matawhānui, o mua hoki i roto i te wāhanga tuatahi ki ngā take kāinga kore mō ngāi Māori, ki ngā take rānei i tāpae ki te kāinga kore mō ngāi Māori. I tohutohu te Taraipiunara ka whai whakaarohia ēnei take ā muri ake i roto i te ruku tātari.

E rima ngā nohoanga i whakahaeretia mō te ruku tātari wāhanga tuatahi i waenga i te Māehe me te Noema o 2021.

I te Mei o 2023 ka whakaputa te Taraipiunara i Kāinga Kore: The Stage One Report of the Housing Policy and Services Kaupapa Inquiry on Māori Homelessness i roto i te hōputu tōmua i te whakaputanga.

Kāinga Kore: The Stage One Report of the Housing Policy and Services Kaupapa Inquiry on Māori Homelessness

Wāhanga tuarua

I te Tīhema o 2022 ka whakaū te Taraipiunara kāhore e whakawehea te toenga o te ruku tātari Wai 2750 ki ngā wāhanga motuhake. Engari, ka rongo te Taraipiunara i ngā take kerēme katoa e toe ana i roto i te ruku tātari matawhānui, ka kokea whakamuatia e te kaupapa (Wai 2750, #2.6.41). Ka whakaputaina tētahi pūrongo matawhānui kotahi i te mutunga o te ruku tātari.

Kei roto i ngā pakitara e whai ake nei te korahi ā-kaupapa mō te toenga o te ruku tātari Wai 2750:

Whenua Māori – Whakamahinga me te whakawhanaketanga o te whenua Māori mō te whare noho.
Te Ao Kāinga – kaupapahere Wharenoho, mahinga me te whakaritenga o te mākete wharenoho.
Whānau Kāinga – He wharenoho pāpori me te whakaratohia o te 'wharenoho tūmatanui' e te kāwanatanga matua, ā-rohe hoki/rānei.
Hauora – Te hononga i waenga i te hauora tinana me te hauora hinengaro kino (me ētahi atu āhuatanga ohapori) me te wharenoho.

I whakatakotohia ngā pūrongo rangahau e whai ake nei hei wāhanga o te hōtaka rangahau mō te toenga o te ruku tātari Wai 2750:

HISTORICAL MĀORI HOUSING, 1840-1934

PRIVATE RENTAL MARKET AND MĀORI, 1991-2021

MĀORI HOME OWNERSHIP, 1991-2021

HOUSING ON MĀORI LAND, 1870-2021

MĀORI HOUSING, 1935-1990

I te Hepetema o 2023 ka kirimanatia e te Taraipiunara ngā pūrongo e rua anō:

He pūrongo mō te wharenoho pāpori me ngāi Māori i waenga i te tau 1991 me te tau 2021, kia whakaritea e Charles Waldegrave rāua ko Joshua Reid (Wai 2750, #2.3.20).
He pūrongo mō te wharenoho motuhake me ngāi Māori i waenga i te tau 1991 me te tau 2021, kia whakaritea e Elizabeth Rowe (Wai 2750, #2.3.21).

Ka whakaputaina e te Taraipiunara tētahi rārangi o ngā kerēme māraurau mō te toenga o te ruku tātari Wai 2750 i te 26 o Hune 2023, ā, i tautuhi ka whakaarohia ngā tono anō mō te whai wāhitanga nā runga anō i te āhuatanga o tēnā, o tēnā kēhi (Wai 2750, #2.6.50). I tonoa ngā kaikerēme kia panoni, kia tuhi taipitopito rānei i ngā whakapae i roto i ō rātou tauākī kerēme hei te 16 o Oketopa 2023.

I te nuinga o te wā ka ahu whakamua ā-kaupapa ngā nohoanga mō te ruku tātari Wai 2750, e tīmata ana ki ngā take whenua Māori. Ko te kawatau ka tīmata ngā nohoanga hei te tau 2024.